CEBU CITY — Gilantaw pa sa kapulisan ang anggulo kabahin sa pagpamanhig-patay sa usa ka inilang abugado kagahapon sa Brgy. Kasambagan, sa dakbayan sa Sugbo.
Una nang giila ang biktima nga si Atty. Joey Luis Wee, 51-anyos, ug usa ka high-profile lawyer gikan sa dakbayan sa Sugbo.
Base sa pasiunang imbestigasyon, mipaingon ang maong abugado sa iyang opisina sa ikatulong andana sa Alchi Building nga nahimutang sa nahitaboan sa krimen.
Matud ni Police Major Dindo Alaras, ang hepe sa Mabolo Police Station, nga giingong gipusil og kaduha sa wala mailhing riding-in-tandem si Atty. Wee ug miikyas dayon.
Daling gidala ang abugado sa tambalanan human nakaangkon og mga samad-pinusilan sa iyang lawas apan nakabsan kini sa kinabuhi ug gideklarar nga dead on arrival.
Una nang gikondenar sa Integrated Bar of the Philippines (IBP) Cebu City Chapter ang kamatayon ni Atty. Wee ug nanawagan og dinaliang aksyon kabahin niini.
Sumala pa sa giluwatang statement nga usa kini ka matang sa pagpang-atake sa habig sa mga abugado. (Report by Bombo Joann Gantalao/EKP/GN)
