Gisaway ni Senador Risa Hontiveros ang Government Service Insurance System (GSIS) human kini namuhunan og kapin sa P1 bilyon sa iladong online gambling platform nga gitawag og DigiPlus.
Sa iyang privilege speech sa plenaryo sa Senado, ang senador nitataw nga gisugal sa ahensya ang kaugmaon sa kapin 2.7 milyones ka miyembro niini, bisan pa sa kusganong pagsupak sa gobyerno sa e-sabong ug ubang matang sa online gambling.
Gitataw ni Hontiveros nga kun gidid-an ang mga kawani sa gobyerno sa pagsugal sa mga casino, nganong daw nagpusta man og dako ang GSIS sa kuwarta nga gideposito sa mga sakop matag buwan?
Ingon niya, ang kasamtangang pamunoan sa GSIS adunay nagbalikbalik nga sumbanan sa pagpabaya ug kwestyonable nga mga desisyon sa pagpamuhunan.
Ang mga lagda nga gilatid, matod niya, sa Kongreso aron sa paggiya ug pagpanalipod sa mga pamuhunan sa GSIS posibleng malapas.
Dili lang ang DigiPlus ang gikataho nga nahunong ang kontrobersyal nga investment sa GSIS.
Gibutyag usab ni Hontiveros nga lakip sa “high-risk” nga investments niini mao ang P1.45 billion subscription deal sa Alternergy Holdings Corporation, nga giingong gisulod nga walay pagtugot sa GSIS Board ug walay endorsement gikan sa risk oversight committees.
Dugang pa, sumala sa Annual Audit Report sa Commission on Audit niadtong 2023, ang GSIS nag-invest ug mokabat sa P2.38 bilyones sa tulo ka kompanya nga giingong walay napamatud-an nga track record sa ginansya o dividend payouts — sukwahi sa GSIS Act.
Gibutyag usab niini ang padayon nga pagpamuhunan niini sa Del Monte Pacific, nga adunay $2.3 bilyon nga utang ug gikataho nga nakatala og P19.1 milyon nga pagkawala sa papel sa bahin sa GSIS.
Kini nga mga pamuhunan adunay kinatibuk-ang pagkawala sa valuation nga ?251.37 milyon — salapi nga mahimong maghulga sa actuarial solvency sa GSIS fund.
Gumikan niini, nanawagan ang senador sa Senado nga i-review ang GSIS Law sa investments gumikan sa sunodsunod nga anomaliya.
Kini, matod niya, mao ang klarong pagbutang og mga guardrail aron mapanalipdan ang pundo sa mga kawani sa gobyerno.
