Ihalad sa bag-ong milyonaryo sa Bombo Radyo Philippines ang 10-porsiento sa nadag-an niini sa ilang simbahan human nabunutan isip major prize winner sa grand draw sa Buena Mano Salvo Year 20 Promo ng Bombo Radyo ug Star FM kagahapon gamit ang putos sa Mr Chips isip proof of purchase.
Matud ni Sheryl Tiologo, 39-anyos, residente sa Purok 6, Sitio Matin-ao, Brgy Bonbon, siyudad sa Butuan, sila mismo sa iyang bana ang nakadungog dihang nabunutan ang iyang pangalan samtang nagkaon sila og bahaw nga gisabwan og kape human nanglaba.
Wala matud pa siya magdahom nga siya ang mahimong ika-81 nga miyembro sa Bombo Millionaire’s Club tungod kay pila ka mga entries lang ang iyang nahulog sa ikatulo ug ikapitong semana sa promo duration.
Puno sa pagdayeg ang iyang nabungat ngadto sa Ginoo tungod kay sa mi-agi pang mga promo nga iyang gi-apilan sa nakalabay’ng lima ka tuig, iyang gipangayo ang usa ka milyon ka pisos nga premyo apan ang ihatag kaniya mao lang ang daily prizes apan karon nga usa ka libo ka pisos lang ang iyang gipangayo, gihatag sa Ginoo ang usa ka milyon ka pisos.
Gisaysay pa ni Tiologo nga iya na kining gi-manifest o gi-ampo sa Ginoo pinaagi sa pagsulat niini sa papel basi na usab sa challenge nga gihatag sa simbahan kanila nga isulat sa papel ang gusto nilang madawat nga grasya gikan sa Ginoo.
Kini human nga wala matud pa madapat sa sakto ang nadawat nilang sien-mil pisos kaniadto kondiin portion lang ang ilang natukod og balay rason nga dakong grasya alang kanila ang iyang na-angkon nga kada-ugan.
