Giinsister ni Representative Francisco Paolo Ortega V sa House nga ang ikaupat nga impeachment complaint batok kang Bise Presidente Sara Duterte kay nakapasar sa sufficiency in form ug kinahanglan na nga mopadayon sa sunod nga lakang.
Atol sa hearing sa House Committee on Justice nga gipangulohan ni Chairperson Jervil Luistro, pormal nga gipresentar ni Ortega ang gitawag nga Cabrera complaint.
Kauban ni Rep. Bienvenido Abante Jr., ilang gipasar ang Resolution of Endorsement niadtong Pebrero 18, 2026 nga gipanumpa atubangan ni Secretary General Atty. Cheloy Velicaria-Garafil.
Gipasiugda ni Ortega nga ang reklamo nga gisang-at mismo sa nagreklamo, si Atty. Nathaniel Cabrera, napamatud-an ug na-notaryohan.
Sumala sa magbabalaod, panahon na aron patubagon ang mga opisyal sa gobyerno bisan unsa pa ang ilang kalambigitan sa politika.
Kini nahitabo taliwala sa bise presidente nga nag-atubang og seryosong mga alegasyon sa paglapas sa Konstitusyon, pagbudhi sa pagsalig sa publiko, graft and corruption ug uban pang seryosong mga krimen nga makadaot sa integridad sa institusyon.
Gihinumduman usab ni Ortega ang panumpa sa bise presidente hapit upat ka tuig na ang milabay nga giingong wala matuman.
Tungod sa kabug-at sa mga alegasyon ug sa igong mga dokumento nga gisumiter, pormal nga gihangyo sa kongresista ang komite nga tugotan ang mga proseso nga mopadayon sa sunod nga yugto aron mogawas ang kamatuoran.
