Gipadayag ni Atty. Rameses Victorius Villagonzalo, usa ka Cebuano Accredited lawyer sa International Criminal Court (ICC), nga bisan kinsa pa ang nagkupot sa usa ka “impeachable position,” dili kini basta-basta makasuhan ug dili mamahimong mobarog ang criminal case batok kaniya hangtod dili pa siya matangtang pinaagi sa impeachment.
Sa pakighinabi sa Bombo Radyo Newsteam kang ni Atty. Villagonzalo, gipaambit niini nga ang labing importante nga batayan o “qualifier” mao ang posisyon ug dili ang tawo. Bisan pa man kon si Jose Rizal o Lucifer ang naglingkod sa maong impeachable position, gikinahanglan gihapon nga sundon ang legal nga proseso sa impeachment sa dili pa ipasaka ang criminal case.
Gidugang usab niya nga “incidental” lamang nga si Bise Presidente Sara Duterte ang anaa karon sa “hot seat,” apan ang probisyon ug patakaran sa balaod hisgotan sa legalidad sa impeachment ug criminal case magamit sa tanang impeachable official.
Tungod niini, gihingusgan sa maong abogado nga samtang ang usa ka opisyal naglingkud pa sa iyang position isip impeachable officer, dili pwedeng iduso o mobarog ang kasong kriminal hangtod dili una siya pormal nga matangtang sa posisyon pinaagi sa impeachment.
Gipaklaro usab ni Atty. Villagonzalo ang proseso sa legal nga aksyon sa higayon nga ang usa ka kaso mabalhin na gikan sa Department of Justice (DOJ) ngadto sa Regional Trial Court (RTC).
Sumala sa abogado, sa higayon nga ma-file na ang kaso sa RTC, anaa na sa kamot sa huwes ang pag-evaluate kon adunay probable cause batok sa akusado.
Diin matud niya nga kon makita sa huwes nga adunay probable cause, aduna kini katungod nga magpagawas og Warrant of Arrest.
Gani, kon sa ebalwasyon makita nga walay probable cause, o kon adunay constitutional issue ug ang usa ka personalidad kay impeachable officer, dili pa dayon basta-basta nga makapagawas og warrant.
