CEBU CITY — Daku ang pagtu-u ni Thelma Chiong nga nakabuhi na sa New Bilibid Prison ang tulo sa pito ka mga konbiktado nga mipatay sa iyahang mga anak nga sila si Marijoy ug Jacqueline Chiong.
Sa eksklusibo nga pakighinabi sa Bombo Radyo ngadto ni Mrs. Chiong, gibutyag niini nga nakabuhi na sa NBP sila si Josman Aznar, Ariel Balansag, ug Alberto Caño.
Matud ni Chiong nga wala kini masayud kung gi-unsa paglantaw ni Bureau of Corrections (BuCor) Director General Nicanor Faeldon ang dokumento sa mga responsabli ug basta na lang gibuhi-an gikan sa nahisgutang jail facility.
Gipadayag sa inahan sa mga biktima nga wala sila gipahibalu sa pagpa-release sa mga konbiktado.
Subay niini, gihagit ni Mrs. Chiong si Faeldon nga pagawason na lang ang tanang kriminal ilabi na ang adunay gagmay lang nga kaso gumikan kay gipagawas man usab sa BuCor ang mga konbiktado nga adunay gibuhat nga linu-ug nga krimen.
Gihimug-atan usab niini nga wala na kini gana nga mutambung sa ipahigayun nga senate inquiry kalabut sa nahisgutang isyu kung ugaling kini imbitaron nga mu-atubang sa senado gumikan kay giingung dili naman kini mabalik pa sa prisuhan ang mga responsabli.
Nagkanayun si Chiong nga ihatag na lang niini sa Diyos ang tanan ug giingung dili mabayran ang sakit nga iyahang gibati hangtud karun.
Samtang gi-imbitar ni Senate Blue Ribbon Committee Chairman Senator Richard Gordon si Thelma Chiong nga mutambung sa senate inquiry sa Setyembre 2, adlaw nga Lunes, alas 10 sa buntag.
Kini subay na sa hisgutanan sa pagbuhi sa tulo sa pito ka mga responsabli sa Chiong murder case.
Matud ni Senator Gordon nga ‘welcome’ nga mutambung si Mrs. Chiong arun nga makapadayag kini sa iyahang sentimento kabahin sa maong isyu arun nga ilaha usab kining mapangitaan ug paagi.
SAYOP NGA PAGPATUMAN SA GOOD CONDUCT RULE?
Gihimug-atan sa senador nga sayup gayud ang gipatuman sa BuCor sa balaud nga Good Conduct Time Allowance (GCTA) hayan ilaha kining imbestigaran.
Sigon pa, kung basihan ang balaud nga GCTA, dili mamahimu nga pagawasun ang mga kriminal nga nakahimu ug nilu-ug nga krimen.
Gipadayag ni Sen. Gordon nga ilahang pagasusihon ang maong balaud ug han-ayun gumikan kay giingung gikinahanglan nga adunay transparensiya ang pagpagawas sa mga pinirisu.
