CEBU – Di mo minos sa 30 ka mga sakop sa Philippine Air Force (PAF) ang gipasakaan og kaso tungod sa pagkabalda sa demolisyon sa Lot 937 sa Sitio San Miguel, Barangay Apas, dakbayan sa Sugbo niadtong Lunes, Nobyembre 14, 2022.
Kasong indirect contempt ang gipasaka batok nila sa Regional Trial Court Branch 9 sa dakbayan sa Sugbo niadtong Martes, Nobiyembre 15, ni Sheriff Edilberto Suarin.
Kung diin si Suarin maoy tigpatuman sa kamandoan sa korte nga gub-on ang mga estraktura sa propyedad.
Ang demolisyon temporaryo nga nahunong niadtong Lunes sa dihang ang mga sakop sa PAF nagbutang og barikada sa lugar.
Sa iyang progress report nga iyang gisumite ngadto sa korte, si Suarin niingon nga iyang gisuwayan nga makig-estorya sa usa ka Lieutenant Colonel Efren Cudal, legal officer sa 560th Air Base Group, apan ang naulahi gikatahong nagdumili sa pagpasulod sa mga sakop sa demolition team sa propiedad.
Matud ni Suarin nga aduna usab silay conference sa Cebu City Police Office (CCPO) niadtong Lunes sa buntag, nga gitambungan nila ni CCPO Director Colonel Ireneo Dalogdog, personnel sa PAF ug Office of the Solicitor General (OSG) ug Edgar Erice, representante sa Mazy’s Capital Incorporate, tag-iya sa Lot 937.
Matod ni Suarin nga ang mga personahe sa PAF ug OSG dili makahimo og temporary restraining order (TRO) aron mahunong ang demolisyon, hinungdan nga gipadayon ang demolisyon.
Sa pikas bahin, si Erice, kinsa nahinabi atol sa pagpasaka sa reklamo, nipasabot nga napasaka ang reklamo tungod kay naa pa ang mga sakop sa PAF sa maong dapit ug subli nilang gisuwayan pagpahunong ang demolisyon nga walay TRO.
Matod niya nga nasurprisa siya sa pag-abot sa mga personahe sa PAF sanglit ang Kapital Mazy nakighisgot na niini sa Visayas Command.
