Gikagubtan sa makahimoot nga reaksyon sa managlaing social media platforms ang usa ka local television series sa Indonesia nga giulohang “Tiger Man” human nag-viral ang mga clip sa transformation sequence niini.
Gihulagway sa mga nakakita sa maong serye nga daw kombinasyon kini sa sikat nga mga Hollywood movies ug series nga “Twilight” ug “Teen Wolf.”
Diin gisundan sa istorya ang kinabuhi sa usa ka high school student nga nakadiskubre nga aduna siyay abilidad nga mamahimong usa ka tigre samtang iyang gipangita ang kamatuoran sa iyang gigikanan.
Apan imbes nga kahadlok ug seryosong supernatural drama ang bation sa mga manan-aw, nahimo kining “internet sensation” ug daling gihimoan og mga memes sa tibuok kalibutan tungod sa ka-low budget sa gigamit nga visual effects ug sa kataw-anang agi sa hulagway sa tigre.
Bisan pa man niini, ang maong mga kataw-anang reaksyon sa publiko maoy naghatag usab og international attention sa maong Indonesian show, diin padayon gihapon kining gi-share ug gi-istoryahan sa mga netizen.
