Gipasamot sa Iran ang mga pag-atake niini batok sa mga interes ug militar sa Estados Unidos sa tibuok Middle East niadtong Miyerkules, taliwala sa gipadayag nga bahad sa Tehran nga makatagamtam og “mas grabe” nga silot ang US human sa gihimong pag-atake sa mga American forces.
Sumala sa Iranian Red Crescent, upat ka tawo, lakip ang usa ka bata, ang namatay ug kapin sa 50 ang nasamdan sa siyudad sa Kuhestak human ang pagpamomba sa US miigo sa usa ka balay diin gipahigayon ang usa ka kasal.
Isip balos, gipahibalo sa Iran nga nagpadala sila og mga ballistic missile ug drone batok sa duha ka base sa US sa Jordan, usa ka air base sa Bahrain, ug mga pasilidad sa militar sa US sa Kurdistan region sa Iraq.
Samtang gikumpirma sa Jordanian army nga naka-intercept sila og 10 ka missile gikan sa Iran, gi-report usab ang mga pag-atake sa Kuwait ug ang pagtingog sa mga alarm siren sa Bahrain.
Ang kasamtangang tensyon kabahin sa nagpadayon nga unom ka bulan nga gubat sa Middle East nga nagsugod niadtong Pebrero human sa pag-atake sa US ug Israel diin namatay ang Supreme Leader sa Iran nga si Ayatollah Ali Khamenei.
Sa pagkakaron, nagpabilin ang giyera sa Strait of Hormuz, ang estratehikong agianan sa lana sa kalibutan, diin gi-blockade kini sa Iran samtang nagpatuman usab ang US og counter-blockade sa mga dunggoanan sa Iran.
Nagpabilin nga wala’y kausaban ang baruganan ni US President Donald Trump, kinsa nagpasidaan sa Truth Social nga mag-atubang ang Iran og “mas bug-at ug mas taas” nga pag-atake kon magpadayon ang ilang pagbalos, samtang gipadayag sa Central Command (CENTCOM) nga ang ilang mga pag-atake gitumong lamang sa pagpanalipod sa mga komersyal nga barko ug sundalong Amerikano.
