CEBU CITY – Dili makamahay si Senate President Vicente Sotto III ang nahimong reaksyon ni Presidente Rodrigo Duterte batok sa Estados Unidos.
Sa pakighinabi sa Bombo Radyo Cebu kang Senator Sotto, gibutyag niini nga bisan kinsang presidente sa usa ka nasud ang dili malipay kung hilabtan ang ilahang justice system sa ubang nasud.
Matud pa, dili man desisyon sa mga government officials o mismo ni Presidente Duterte ang pagkapriso karun ni Senator Leila de Lima inay ang Supreme Court sa Pilipinas, butang nga dili na angayang hilabtan sa Estados Unidos gumikan kay dili naman usab niini kolonya ang nasud.
Gihimug-atan ni Sotto nga gipadako lang sa mga supporters ni De Lima ang nahisgutang isyu.
Giklaro sa senador nga tinuod nga adunay resolusyon nga gipasaka sila si US senator Dick Durbin ug Patrick Leahy nga nag-ban ug entry sa US sa mga government officials nga nagpapriso kang De Lima apan giingong dili tinuod nga gilakip kini sa ilahang budget ug gipirmahan pa ni US President Donald Trump.
Gikwestyon usab ni Senator Sotto ang giingong pagpirma ni Trump sa maong resolusyon kung gipasaka kini sa iyahang kaatbang nga mga Democrats.
