USA — Natanggong sa prisuhan ang usa ka Jamaican national sulod sa tulo ka buwan sa Washington human nga nagdala og mga botelya sa dugos kon honey gikan sa Carribbean island.
Kini human nga nagtuo ang mga customs agents nga giingong liquid metamphetamine ang bitbit sa lalaki.
Naandan na sa dinakpan nga si Leon Haughton, 45 anyos, nga mobalik sa Jamaica matag Pasko.
Mobakasyon unta si Haughton sa nakalabay nga Pasko apan nasimhutan sa mga sniffing dogs ang bitbit niining mga dugos sa Baltimore-Washington International Airport.
Matud niini nga nagdala unta kini og honey isip pampatam-is sa iyang tsa.
Nasikop dayon ang maong Jamaican ug nabalhog sa prisuhan tungod sa pasangil nga nagdala og metamphetamine.
Gipaubos sa laboratory test ang honey sa Maryland sulod sa kapin duha ka semana ug nagnegatibo kini sa ilegal nga substance.
Hangtud nga gipaubos ang mga honey bottles sa Georgia gumikan kay nakuwangan man sa analysis ang unang test niini.
Samtang gipaubos usab sa detention process si Haughton kauban ang US immigration services ilabi na nga green card holder kini.
Gi-contact pag-ayo sa abugado sa dinakpan ang mga immigration authorities aron sukit-sukiton ang iyang background.
Niadto lang Marso 21, nakagawas si Haughton sa prisuhan human nasuta sa laing tst nga nag-transport lang kini og honey.
Tungod sa iyang pagkapriso sulod sa tulo ka buwan, unya layo pa gyud sa iyang pamilya, natangtang kini sa trabaho isip cleaner ug construction worker.
Direktang gipasanginlan ni Haugton ang otoridad tungod sa sayop nga pagkasikop kaniya, ingon man sa iyang pait nga kasinatian sa prisuhan bisan pa man nga igo lang kini mibitbit og honey.
