CEBU CITY-Gikaon sa kalagot ang bana human kini nasakpan ang iyang asawa nga adunay katapad nga laing lalaki sa usa ka kwarto hinungdan nga nakabuhat kini sa pagdunggab sa 30-anyos sa Sitio San Roque Barangay Lorega sa dakbayan sa Sugbo.
Wala nay kinabuhi nga miabot sa Cebu City Medical Center ang biktima nga giilang si Raymart Ricardo Baril nga taga T. Padilla street, Barangay Day-as Cebu City kinsang nakabsan sa kinabuhi human kini nakaangkon og dinunggaban sa iyang kalawasan.
Samtang, samdan usab ang babaye nga giilang si Bethy Bolaño Uy, 31-anyos, nga nag puyo sa naasoy nga dapit.
Base sa imbistigasyon sa Parian police station diin ginangulohan ni Police Major Henry Orbiso nga samtang nagtupad sa pagpangatulog ang duha kalit lang nga naabot ang bana ni Uy nga si Emebert Cruz Uy, 34-anyos, ug gipangpukaw niiini ang malinawon nga pagkatulog ug kalit nga gidunggab sa kutsilyo.
Ingon man nga malampuson kining nasikop sa Police Station 1, Cebu City Police Office gumikan sa ilang gipahigayon nga follow up operation batok sa suspetsado.
Kasamtangang natanggong sa Parian Police Station detention facility alyas ‘Em-Em’ samtang giandam ang kasong murder nga ipasaka sa korte ngadto kaniya.
