CEBU CITY- Nagpadayon ang kabalaka sa mga rice retailers sa Cebu ug sa tibuok Pilipinas tungod sa kakulang sa supply ug padayon nga pagsaka sa presyo sa bugas.
Sa pakighinabi sa Bombo News team kang Erwin Gok-ong, Vice President sa Grain Retailers Confederation of the Philippines-Cebu, ang presyo sa bugas nagsugod sa pagtaas sukad sa Hulyo 2025.
Kini tungod sa kombinasyon sa limitado nga supply sa local rice gikan sa Manila ug Mindanao, ang delayed nga harvest sa Central Plains sa Luzon, ug kakulangan sa imported rice sa merkado.
Matud ni Gok-ong, bisan pa man sa pagsaka sa presyo, responsibilidad sa mga retailers nga magpabilin ang integridad ug social responsibility sa publiko, gumikan kay importante nga dili mawala ang pagsalig sa katawhan ug malikayan ang panic buying.
Giklaro niya nga ang lokal nga rice wala’y price cap o kontrol sa merkado, mao nga ang presyo nagbase sa supply ug demand.
Ang imported nga bugas, bisan pa man barato sa wholesaler nga nag-range sa 50 pesos kada kilo, limitado ang supply ug dili makapahupay sa presyo sa merkado.
Matod pa ni Gok-ong, ang pagtaas sa presyo sa lana sa Middle East nakapadugang sa gasto sa logistics ug nakapugos sa pagtaas sa presyo sa bugas sa lokal nga merkado.
Tungod niini, mas dako ang epekto sa ordinaryong konsumidor, ilabi na sa gagmay nga pamilya ug sa mga low-income households.
Gipahimangnoan sa Grain Retailers Confederation nga ang mga retailers nagbantay sa presyo, nag-coordinate sa suppliers, ug nagplano aron malikayan ang sobra nga pagtaas sa presyo o kakulangan sa merkado.
Sa kasamtangan, ang publiko gi-awhag sa pagpamalit nga husto ug dili mag-panic buying samtang naghulat sa sunod nga shipment sa local ug imported rice.
Ang Grain Retailers Confederation nagangayo sa pagsabot sa katawhan sa karong kahimtang samtang nagpadayon ang monitoring sa presyo ug supply sa bugas sa Cebu ug sa tibuok Pilipinas.
