Gipakita sa House of Representatives nga dili angayan nga ibaliwa ang impeachment complaint nga gipasaka batok kang Bise Presidente Sara Duterte.
Kini maoy gipahibalo ni kanhi Senador Leila De Lima, kinsa usa usab sa nipasaka og reklamo.
Ang pamahayag ni De Lima nunot sa lakang sa Kamara sa pag-impeach sa bise presidente, nga nahitabo sa kataposang adlaw sa sesyon sa wala pa kini ma-adjourn.
Si De Lima niingon nga ang Kongreso mihimo lang sa husto ug tukma nga mga lakang alang sa atong katawhan.
Gihatagan og gibug-aton sa kanhi Senador nga dili personal nga away ang impeachment, dili lang kini mahitungod ni VP Sara, ug dili usab angay isipon nga politika.
Dugang ni De Lima nga mao kini ang pakigbatok sa katawhang Pilipino batok sa abuso, korapsyon, ug walay pagtagad sa mga institusyon, walay pagtahod sa mga proseso nga nalatid sa konstitusyon.
Matod niya klaro ang mga alegasyon batok kang VP Duterte, sama sa paspas nga pagpangawkaw sa minilyon nga confidential funds nga walay saktong katin-awan, paggamit sa posisyon alang sa personal nga ganansya, ug ang dayag nga pagsuway sa pagdaot sa mga proseso nga nagsiguro sa responsibilidad sa gobyerno.
Gitumbok niini nga ang kuwarta nga gigamit nga walay katin-awan mao ang kuwarta sa katawhan nga unta alang sa edukasyon, tambal sa mga masakiton, ug hinabang sa mga kabus.
Matod niya nga dili makiangayon nga adunay mga pamilya nga dili makakaon sa tulo ka kan-anan sa usa ka adlaw, samtang adunay usa ka lider nga mogasto og minilyon nga walay katin-awan.
Gihagit ni De Lima ang mga representante sa Kongreso nga pamatud-an nga mahimo nilang ipadaplin ang personal ug politikanhong interes ug ipaglaban ang husto.
Ang proseso kinahanglan nga patas ug transparent, ug tinuod nga nagpasiugda sa hustisya.
Nanawagan si De Lima sa mga grupo nga nisang-at og impeachment complaints batok kang VP Sara nga magmabinantayon ug bantayan ang proseso sa impeachment.
Gipasalig ni De Lima nga ilang bantayan ang proseso sa impeachment tungod kay adunay giandam nga mekanismo sa pagpugong o pagbabag sa impeachment.
