Cebu City-Dili pa matumbok kung party drug overdose gayud ang rason sa kamatayon sa 19 anyos nga babaye nga namatay human nga mitambong sa usa ka Pre-Sinulog party sa usa ka establisamento sa dakbayan sa Sugbo.
Matud ni PDEA-7 Director Wardley Getalla nga gikinahanglan nga mapaubos gayud sa autopsy ang lawas ni Ashley Abad aron masuta kung unsa gayud ang hinungdan sa kamatayon niini.
Dili matud pa mahimo nga mupagwas og pamahayag ug ipasangil ngadto na sa drug overdose ang rason sa kamatayon niini hilabi na ug walay basehan. Padayon matud pa nga gikumbinser sa PDEA ang pamilyang Abad nga ipa autopsy ang lawas sa ilang anak.
Dugang pa ni Getalla nga pinaagi sa autopsy masuta usab kung unsa nga matang sa party drugs ang gisagol sa ilimnon sa biktima.
Nasayran nga kalit lang nga mi collapse si Abad sa dihang mitambong kini sa usa ka concert niadtong January 19 ug nakabsan sa iyahang kinabuhi sunud adlaw.
Una na nga gibutyag sa PRO-7 nga drug overdose ang gikamatyan sa maong dalaga base na usab sa death certificate niini.
