LAPU-LAPU CITY,CEBU- Misang-at og motion to quash o pagbasura sa kaso ang kampo sa mga opisyal sa Department of Public Works and Highways (DPWH) Davao Region, lakip si Sara Discaya, may kalabutan sa gitawag nga ghost flood control project, atol sa hearing nga gipahigayon sa Lapu-Lapu City Regional Trial Court karong adlawa Lunes, Enero 5, 2026.
Ang maong mosyon gisumite pinaagi sa ilang legal counsel nga si Atty. Randi Torregosa, nga mao usab ang lead counsel ni DPWH XI OIC District Engineer Rodrigo Larete, samtang nagpadayon pa ang imbestigasyon ug legal nga proseso sa maong kaso.
Matod ni Atty. Torregosa, dili magamit sa mga akusado sa maong kaso ang mando sa Korte Suprema nga nagmando sa pagbalhin sa pipila ka mga kaso ngadto sa laing judicial region.
Gipasabot pa niya nga ang kaso angay magpabilin sa Regional Trial Court sa Malita, Davao Occidental, tungod kay walay usa sa mga akusado ang naghupot og posisyon nga adunay Salary Grade 27 o mas taas, usa ka rekisitos ubos sa mando sa Korte Suprema.
Kahinumdoman nga gidakop si Sarah Discaya ug walo pa ka mga opisyal sa DPWH Davao Region nga giakusahan sa mga kasong graft ug malversation, nga may kalabutan sa mga anomalous flood control projects.
