Kompirmado nga anaa sa Timor-Leste ang suspek sa pagpatay ug kanhi representante sa Negros Oriental nga si Arnolfo “Arnie” Teves Jr.
Kini subay sa post ni Pamplona Mayor Janice Degamo, niadtong Biyernes sa gabii, Setyembre 29, 2023, kung diin ang maong video nagpakita nga gigakos ni Teves si kanhi senador Emmanuel “Manny” Pacquiao sa pag-abot sa naulahi sa Timor-Leste karong semanaha.
Ang mayor mao ang biyuda ni Negros Oriental governor Roel Degamo, kinsa gipusil-patay niadtong Marso 4 sa iyang pinuy-anan sa lungsod sa Pamplona, kauban ang siyam ka uban pa.
Dugang pa, nga ang mga taho sa nasudnong media mikutlo sa tigpamaba sa Department of Justice nga si Mico Clavano nga nag-ingon kaniadtong Biyernes nga ang paggakos nahitabo pagkahuman sa usa ka higayon nga engkwentro sa airport ug nga si Pacquiao mibiyahe sa nasud sa Southeast Asia dili aron makita si Teves, apan aron motambong sa mga kalihokan diin siya giimbitahan ni Timor-Leste President Jose Ramos Horta.
Kung kahinumduman nga niadtong Septembre 5, ang korte sa Manila niisyu og warrant of arrest batok sa gipalagpot nga representante sa Negros Oriental Third District ug tulo sa iyang giingong mga kauban tungod sa pagpatay kang Gobernador Degamo ug siyam pa.
Sa sayo pa, niadtong Hulyo, ang Anti-Terrorism Council (ATC) mitudlo kang Teves, ug sa iyang igsuon nga si kanhi Negros Oriental governor Pryde Henry Teves, ug 11 ka uban pa nga “terrorist individuals” human kini gi-tag kang Teves nga mastermind sa pagpatay kang Degamo.
