Nagtuo si kanhi Supreme Court Justice Antonio Carpio nga mag-atubang og lisod nga legal battle ang kampo ni kanhi Presidente Rodrigo Duterte, tungod sa mga kasong crimes against humanity nga iyang giatubang sa International Criminal Court.
Kini tungod usab sa ‘firsthand experience’ sa mga nagsilbing testigo batok kaniya, sama niadtong nagpaila nga sakop sa Davao Death Squad (DDS) nga giingong nalambigit sa mga pagpamatay nga gipasangil sa kanhi presidente.
Giinsister ni Carpio nga aduna silay personal nga kahibalo samtang gihimo ang pagpatay sa mando sa kanhi presidente.
Matod niya lisod tubagon o sukwahi ang maong mga testimonya.
Bisan og mahimong hagiton o kuwestiyonon sa kampo sa kanhi presidente ang legalidad sa pagdakop kaniya bisan sa wala pa ang gikatakda nga pagdungog sa Setyembre 2025, ug bisan og ideklarar sa korte nga ilegal ang pagdakop, kay dili gihapon maapektuhan ang hurisdiksyon sa ICC.
Gipasabot sa kanhi mahistrado sa Korte Suprema nga walay labot ang ICC sa mga pagdakop nga gihimo o nahitabo sa Pilipinas ug tungod kay mi-surrender na kanila si Duterte ug magpabilin ang hurisdiksyon niini kaniya.
Kahinumduman nga ang legal team sa kanhi presidente unang niinsister nga kidnapping ang pagkasikop ni Duterte, hangtod nga gitugyan na lang siya sa mga awtoridad sa The Hague, Netherlands, diin nagbase ang international tribunal.
