CENTRAL VISAYAS- Nasakmit ang kapin sa usa ka kilo sa gituohang shabu nga nagkantidad og ₱7,038,000 ug usa ka kalibre .45 nga pistola sa gipahigayon nga buy-bust operation sa Barangay San Isidro, dakbayan sa Tagbilaran, Agosto 12, 2025.
Sa impormasyon nga nadawat sa Bombo Radyo, alas 6:51 sa gabii gipahigayon ang operasyon sa panaghiusa sa Provincial Drug Enforcement Unit, Tagbilaran City Police Station, Regional Intelligence Division 7, Regional Intelligence Unit 7, PDEA-Bohol, ug PNP Drug Enforcement Group – Special Operations Unit.
Ang nakumpiskang droga adunay gibug-aton nga 1,035 gramos ug standard street value nga kapin sa ₱7 milyon.
Gilakip usab sa ebidensya ang armas ug mga drug paraphernalia nga gipaubos na sa eksaminasyon sa Bohol Provincial Forensic Unit.
Ang suspek gitanggong sa Tagbilaran City Police Station ug mag-atubang sa kaso sa paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.
Gidayeg ni PBGen Redrico A. Maranan, director sa Police Regional Office 7, ang kapulisan sa Bohol sa padayon nga paningkamot batok sa ilegal nga drugas.
