Mokabat sa 212,022 ka mga tawo ang giila nga apektado sa kadaot nga gipahinabo sa Bagyong Paolo, base sa opisyal nga taho sa Department of Social Welfare and Development (DSWD) Disaster Response management.
Kini mukabat sa gibana-banang 66,993 ka pamilyahan.
Suno sa DSWD, adunay kinatibuk-ang sa 659 ka barangay ang naapektuhan sa bahin sa Ilocos Region, Cordillera Administrative Region, Cagayan Valley, ug Central Luzon.
Sa pagkakaron, 500 ka evacuation centers ang abli sa nagkadaiyang bahin sa Northern Luzon nunot sa epekto sa maong bagyo.
Adunay kinatibuk-ang 19,777 ka mga tawo o anaa sa 6,793 ka pamilya ang nagpabilin sulod sa mga evacuation center.
Kapin sa 8,700 ka mga tawo ang mipili nga temporaryong magpabilin sa ilang mga kaila ug mga paryente.
Sumala sa DSWD, adunay 11 ka mga balay ang una nang natumbok nga apektado samtang ang uban padayon pang gi-verify.
