Kapin sa 3,000 ka mga magtutudlo ug school heads sa Sugbo ang bag-ong na-promote sa ilang mga posisyon atol sa mass oath-taking ceremony nga gipahigayon sa IEC Convention Center diri sa dakbayan sa Sugbo niadtong Lunes, Marso 16, 2026.
Personal nga mitambong sa maong kalihukan si Presidente Ferdinand “Bongbong” Marcos Jr. kauban si Education Sec. Sonny Angara ug mga lokal nga opisyal sa Sugbo isip kabahin sa inisyatiba sa administrasyon nga walay magtutudlo nga muretiro nga ubos og ranggo ug benepisyo.
Ang seremonyas kay kabahin sa Expanded Career Progression (ECP) sa Department of Education (DepEd) nga nagtumong sa kinatibuk-ang 100,000 ka mga magtutudlo sa tibuok Pilipinas ang ma-promote karong tuiga.
Gani diri sa Sugbo, adunay 3,325 ang bag-ong na promote kagahapon nga gikan sa 44 ka mga lungsod sa tibuok probinsya.
Gitanyag sa presidente nga dako ang matampo sa bag-ong heerasyon ang pag-amuma sa mga magtutudlo nga maoy tinubdan sa mas malambuong nasud sa muabot nga panahon.
