CEBU CITY — Mokabat sa P3.2-M ang kantidad sa mga gidudahang shabu ang nasakmit sa mga sakop sa Philippine Drug Enforcment Agency (PDEA-7) human sa tulo ka managlahing operasyon kagahapon sa Tagbilaran City, Bohol.
Inabangan sa mga kapulisan sa naasoy nga dakbayan, nalit-ag sa ahensya ang tulo ka mga giilang High Value Target.
Gipahigayon ang unang operasyon sa kapin alas tres sa Borja St., Brgy. Poblacion II, dakbayan sa Tagbilaranug nasikop si Renedette Manija, 31 anyos, lumulupyo sa Brgy. Cabawan sa naasoy nga dakbayan.
Usa ka buwan nga gi-monitor si Manija, kansang maka dispose ug 100 ka gramos matag buwan sa naasoy nga dakbayan ug sa mga kasikbit nga lugar.
Nakuha sa operasyon ang 6 ka mga pakete sa gidudahang shabu nga adunay gibug-aton nga 150 gramos ug nagkantidad og P1,020,000, buybust money ug uban pang non drug evidence.
Pagkataud-taod, nasikop ang dinakpan nga si Archie Intia Abad, 29 anyos ug lumulupyo sa Brgy. Abucayan Norte, Calape, atol sa laing operasyon sa Tamblot St., Brgy. Cogon sa naasoy nga dakbayan.
Nasignit sa maong dinakpan ang 125 gramos sa gibug-aton sa ilegal nga drugas sulod sa 5 ka pakete ug nagkantidad og 850, 000 ka pesos, buybust money ug uban pang non drug evidence.
Wala nakaipsot ang ikatulo nga HVI kinsang nasikop sa ikatulo nga operasyon nga si Camilo Ibay Malicse, 50 anyos ug lumulupyo sa Brgy. Montaña, Baclayon Bohol kansang nalit-ag human nasikop sa laing operasyon sa may Brgy Bool, Tagbilaran City.
Nakuha sa maong operasyon ang 7 ka mga pakete sa gidudahang shabu nga adunay gibug-aton nga 200 gramos diin nagkantidad ug 1,360,000 ka pesos, buybust money, ug uban pang non drug evidence.
Mag-atubang ang mga high-value-individual targets og kasong kalapasan sa Comprehensive Dangerous Drugs Act of 2002 o RA 9165. /with reports by Bombo Joann Gantalao/EKP/GN
