CEBU – Sugdan na sa kapulisan sa dakbayan sa Sugbo ang imbestigasyon aron masayran kon kinsa ang nagpaluyo sa pagdunggab sa usa ka saag nga iro nga ginganlag ‘Bonbon.’
Nipahibawo si Police Lieutenant Colonel Wilbert Parilla, deputy director for administration sa Cebu City Police Office, nga ila nang gimandoan ang station commander sa Mabolo Police Station nga si Police Major Eraño Regidor nga susihon ang maong kaso.
Kahinumduman nga ni-apelar ang Cebu City Council, pinaagi ni Konsehal Rey Gealon, sa kapulisan sa pagsubay sa mga indibidwal nga nagpasakit sa iro.
Nag-viral sa social media si Bonbon human kini nakit-an nga nagsuroysuroy sa kadalanan sa Barangay Bonbon nga adunay nakataop nga kutsilyo sa iyang ulo.
Bisan og naluwas ang iro sa pagpanunggab pinaagi sa tabang sa Cebuano community, gusto ni Gealon nga mailhan sa kapolisan ang mga nagpaluyo niining kasong animal cruelty aron mapasakaan og kaso.
