Misaka na sa 2,942 ang natala nga kaso sa dengue sa Bohol, lakip ang 20 ka nangamatay, base sa pinakabag-ong datos sa Provincial Epidemiology and Surveillance Unit (PESU) alang sa panahon nga Enero 1 hangtod Septiyembre 12, 2026.
Gikan sa 2,942 ka kaso, 12 ang kumpirmado nga dengue-related deaths, duha ang probable ug unom ang suspect, nga nagresulta sa Case Fatality Rate o CFR nga 0.68 porsyento. Mas taas kini kumpara sa samang panahon niadtong 2025 nga adunay 1,877 ka kaso ug lima ka namatay, o 0.27 porsyento nga CFR.
Ang edad sa mga nataptan sa dengue naglangkob gikan sa zero hangtod 94 anyos, samtang ang median age anaa sa 14 anyos. Mas daghan usab ang kaso sa mga lalaki nga mikabat sa 50.78 porsyento. Labing apektado ang mga batang 5 hangtod 10 anyos, nga mikabat sa 22.60 porsyento sa tanang natala nga kaso.
Pinakadaghan ang kaso gikan sa Tagbilaran City nga 9.52 porsyento, gisundan sa Talibon nga 8.46 porsyento, Ubay nga 6.53 porsyento, Tubigon nga 6.12 porsyento, ug Inabanga nga 4.6 porsyento.
Matud ni Leonidas Saniel, Dengue Program Coordinator sa Provincial Health Office, dili husto ang pagtuo nga panahon lamang sa ting-uwan kasagarang mosaka ang dengue cases. Matud niya, mas aktibo ang lamok panahon sa init tungod kay mas paspas kini gutmon ug mahimong mas agresibo sa pagpangita og dugo.
Busa, iyang gipahimangnoan ang publiko nga dili lamang panahon sa ting-uwan o ting-init magbantay batok sa dengue, kondili kinahanglan ang padayon nga paglikay ug pagmonitor sa tanang panahon.
Padayon usab ang awhag sa Provincial Health Office sa publiko nga sundon ang 4S Kontra Dengue, ilabi na ang sayo nga pagkonsulta kung adunay mga sintomas o suspetsa sa dengue aron malikayan ang paglala sa sakit ug posibleng kamatayon.
