CEBU CITY- Gikonsidirar na karun sa Cebu City Police Office nga ‘Case Closed’ ang kasong pagpanapat ug pagtuslok sa mata kang Dr. Charles Pactol Sia, sulod mismo sa iyahang Clinic, sa Quensroad Barangay Kamputhaw Dakbayan sa Sugbo.
Kini human pormal nang napasakaan ug kaso sa kapulisan ang duha ka responsabli sa naasoyng krimen, kasong serious physical injury ug grave threat ang gipasakang kaso sa duha, kinsa wala una gihinganlan samtang wala pa malutsan ug warrant of arrest.
Gitino ni Police Colonel Ireneo Dalogdog, ang City Director sa Cebu City Police Office, nga anggulong may kalambigitan sa Personal nga kasungian ang hinungdan, kini human masayran nga ang usa sa mga akusado hinigugma sa usa sa mga gipasakaan ug kaso ni Dr. Sia, tungud sa utang.
Nasayran sa imbistigasyun sa kapulisan nga adunay tulo ka mga indibidwal nga gipangkiha si Sia tungud sa utang ug ang duha niini na dismiss na sa korte, ug ang kasamtangang naa sa korte mao ang kaso sa usa ka babaye kinsa ang hinigugma mao ang nihimo sa pagtusok sa mata sa biktima.
Giklaru noon sa opisyal, nga walay labut sa kaso ang maong babaye, sanglit dili man siya ang nihimo sa krimen kundili ang hinigugma niini ug ang laing kauban.
Sa pikas bahin, ang Abellana Police Station 2 nipasaka og reklamong serious physical injury ug grave threat batok sa duha ka mga suspek niadtong Biyernes.
Apan wa pa mabutyag ang mga pangalan sa mga suspek sanglit gipangita pa kini sa kapolisan. Ang mga suspek giingong wala pa makabiya sa dakbayan sa Sugbo.
