Gipaluyohan sa Korte Suprema ang subpoena sa Senado aron pugson si kanhi Bamban Mayor Alice Guo sa pagtestigo sa imbestigasyon.
Sa desisyon nga gisulat ni Associate Justice Japar Dimaampao atol sa En Banc session sa Korte Suprema, gibasura niini ang petisyon ni Alice Guo kalabot sa subpoena.
Gusto sa kampo sa kanhi mayor nga hagiton ang maong subpoena sa Senate Committee on Women, Children, Family Relations, and Gender Equality (Committee) nga gustong moimbitar kaniya isip resource person.
Ang subpoena may kalambigitan sa imbestigasyon sa Senado sa ilegal nga operasyon sa Philippine Offshore Gaming Operator o POGO sa Bamban, Tarlac diin siya nagserbisyo isip mayor.
Kahinumduman nga nag-isyu ang Senado og arrest order batok kang Alice Guo tungod sa kapakyas sa pagtunga sa duha ka hearing.
Busa si Guo misang-at og petisyon sa Korte Suprema, nga nag-angkon nga ang Senado nakalapas sa iyang katungod sa hustong proseso, pribasiya, ug seguridad.
Gihangyo usab niya ang Korte Suprema nga tangtangon ang contempt order batok kaniya.
Hinuon, gipasabot sa Korte Suprema nga walay nalapas ang Senado ug gisunod nila ang Senate Rules of Procedure ug ang konstitusyon.
