Nimando ang Korte Suprema (SC) sa House of Representatives sa pagkomento sa petisyon nga gisang-at sa mga vlogger ug social media influencers nga nagkuwestiyon sa legalidad sa imbestigasyon sa giingong pagpakatap sa fake news ug malisyoso nga content sa social media platforms.
Sa usa ka mensahe, si SC spokesperson Atty. Camille Ting miingon nga ang korte mimando sa mga respondents sa pagkomento dili molapas sa 15 ka adlaw gikan sa pagkadawat sa pahibalo.
Lakip sa mga petitioners mao sila si kanhi Press Secretary Trixie Cruz-Angeles, Krizette Laureta Chu, Sass Rogando Sasot, Mark Anthony Lopez, Lorraine Marie Badoy-Partosa, Jeffrey Almendras Celiz (Eric Celiz), Dr. Richard Mata, Ethel Pineda Garcia, Joie De Vivre (Elizabeth Joi Cruz), Aaron Peรฑa ug Mary Jean Reyes.
Base sa ilang petisyon, ilang gihingusgan nga ang inquiry nga gihimo sa House Tri Committee nakalapas sa ilang constitutional rights to free speech, expression, ug freedom of the press.
Usa sa mga respondents sa petisyon nga si Surigao del Norte Rep. Robert Ace Barbers, maoy unang nidepensa sa iyang kaugalingon ug niingon nga dili tuyo sa joint panel nga sumpuon ang ilang kagawasan sa pagsulti o pagpahayag, kondili gusto lang niini nga i-regulate ang pagkaylap sa mga bakak nga impormasyon sa social media.
Kahinumduman nga si Cong. Barbers maoy target sa fake news sa social media nga naglambigit kaniya sa ilegal nga drugas.
Nahitabo kini taliwala sa kataas sa imbestigasyon sa mga ilegal nga kalihokan sa nasud lakip na ang kontrobersyal nga Philippine offshore gaming operators (POGOs), illegal drug trade, ug extrajudicial killings sa war on drugs sa miaging administrasyong Duterte.
