Gibatikos na usab ni Kris Aquino ang mga nagpakatap og sayop nga impormasyon ug wishing Kris dead posts sa social media sa iyang pagpaambit og update sa iyang padayon nga pagtambal sa mga sakit nga autoimmune.
Sa iyang Instagram post niadtong Biyernes, Oktubre 17, si Kris nagkanayon: Friends have been sharing with me probably the 80th bad taste wishing KRIS dead post you are a liar!
Gitumbok niini ang usa ka peke nga post nga namasangil niini nga giingung mi-collapse kini sa usa ka family gathering, kauban pa ang usa ka AI-generated nga hulagway sa iyang kaugalingon nga himatyon na aktress.
Iya kining gihimakak ug niingon nga ang tinuod nga hulagway kuha samtang nagbasa siya og libro sa iyang iPad niadtong Miyerkules sa gabii.
Gipaambit usab ni Kris ang usa ka delikado nga kasinatian human sa usa ka infusion treatment, diin ang iyang kinabuhi hapit sa peligro.
Matod ni Kris, kasamtangan siyang nag-isolate sa iyang mga anak nga sila si Josh ug Bimby tungod kay ubos kaayo ang iyang immunity. Bisan pa niini, mapasalamaton siya nga gihatagan siya ug panahon sa magbasa ug mag-ampo.
Gibutyag usab niya nga wala pa siya hingpit nga naayo, apan mikunhod na ang mga sintomas sa iyang mga sakit sama sa grabeng pag-ubo ug pagpula sa nawong.
Kahinumdoman nga bag-o lang gipaubos ni Kris ang pipila ka surgical procedures isip kabahin sa iyang mas agresibong pagtambal.
