CEBU CITY — “Shape up o ship out,” kini ang nahimung banat ni Cebu City Mayor Edgardo Labella sa ngadto Vallacar Transit human nakigtagbo sa mga tagdumala sa Ceres Bus Unit kagahapon.
Gibutyag ni Labella nga adunay posibilidad nga dili na padaganun ang mga Ceres bus sa syudad kung magpadayon man ang mga panagbangga nga gikalambigitamn sa maong bus operator.
Nasayran sa meeting kagahapon nga 38 ka mga vehicular accident ang natala sa syudad ug 22 niini ang nagagikan sa Ceres Bus gikan sa buwan sa Setyembre hangtud sa Oktubre.
Matud pa ni Labella nga na-alarma kini sa sunod-sunod nga insidente sa kadalanan maong ni-awhag kini sa kumpanya sa bus nga magtinarung ang ilang driver sa pagmaneho.
Dugang pa sa mayor posible kining mangita og laing bus operator isip alternatibo sa naandang public transportation sa Sugbo sama lang sa MyBus ug uban pang mga independent buses.
Sa laing bahin, gibutyag ni LTFRB-7 Director Eduardo Montealto nga sensitibo kaayo ang LTFRB-7 ngadto sa Ceres bus sanglit sunud-sunod na ang nahitabong panagbangga sukad pa sa nakalabay nga semana.
Tungod niini, nagpadala na ang ahensya og summon ngadto sa maong bus operator aron subayon kung nganong nahitabo ang mga panagbangga sa dagkong dalan.
Suspendido na ang unom ka mga bus gikan sa maong operator human malambigit sa mga panagbangga sa dalan. (report by Bombo Jun Salde/ekp/gn)
