Miabot na sa 14 ang namatay human sa 7.3-magnitude nga linog nga miigo sa Vanuatu niadtong Disyembre 17, 2024.
Matud sa local police sa Vanuatu, naglakip kini sa duha ka intsik ug mga residente.
Gawas sa mga kaswalti, kapin sa 200 usab ka mga tawo ang gikataho nga naangol sa linog.
Hangtod karon nagpadayon pa ang rescue ug retrieval operations sa mga pasilidad nga nahugno diin pipila sa mga natanggong niini giingong padayon pa nga nakigkomunikar sa mga rescuers.
Ingon man nga gawas usab sa mga komersyal nga establisemento, daghang mga publikong edipisyo ang nahugno lakip ang mga embahada, ospital, simbahan, ug uban pa.
Sumala sa National Disaster Management Office sa Vanuatu, dakong bahin sa kapital nga siyudad sa Port Villa ang nawad-an sa suplay sa kuryente, tubig, ug koneksyon sa internet human sa kusog nga pagtay-og sa yuta.
Gani, hangtod karon nagpadayon ang aftershock nga nasinati sa mga lungsoranon diin ang labing kusog mao ang 6.1 nga gibati sa kaulohan.
Daghang mga nasud ang naghatag usab og tabang sa Vanuatu sama sa US, diin ang United States Agency for International Development kay nagpadala og team aron motabang sa rescue ug retrieval ops.
Ang ubang mga nasud sama sa Australia, France, China, ug bisan sa United Nations, mihatag usab sa ilang tagsa-tagsa ka pasalig nunot sa kusog nga linog.
