CEBU CITY – Usa ka 46-anyos ang nasikop kagahapon human nga masakpan kini nga nagbaligya og peke nga vaccination cards kontra COVID-19 sa Sanciangko Street, Barangay Kalubihan, dakbayan sa Sugbo.
Nakatanggong karon ang suspek sa Carbon Police Station 5 ug nailhan nga si Clifford Arcilla, taga Barangay Talamban, sa susamang syudad.
Nakuha gikan sa suspek ang tulo ka fake vaccination cards diin mag-atubang kini og reklamo nga “falsification of public documents”.
Nasayran usab nga adunay printing shop si Arcilla ug iyang asawa nga nahimutang lang sa Sanciangko diin gibaligya lang ang cards sa tag 450 pesos matag usa.
Samtang, nakig-alayun na si Cebu City Councilor David Tumulak sa Mandaue City government human nga nasayran nga gikan sa Mandaue ang gigamit nga peke nga vaccine card.
Gawas niini gipasusi na niini sa Business Permits and Licensing Office (BPLO) ug sa City Treasurer’s Office (CTO) kung balido ba ang permit sa printing shop nga gipanag-iya sa suspek.
Sapagkakaron, gitutukan sa Cebu City police ang mga printing shop ilabi na sa mga iligal nga aktibidad susama niini.
Samtang, gi-awhag usab ni Tumulak ang uban pang mga Local Government Units (LGUs) nga magbutang og QR codes sa ilang vaccination cards arun daling ma-trace ang tag-iya ug mas lisod nga makopya.
Nasayran nga walay QR codes ang vaccine card gikan sa Mandaue.
Gawas niini nagpatabang na usab kini sa Department of Health (DOH-7) ilabi na sa mga posibling gikawat nga impormasyon sa maong peke nga vaccine cards.
Bisan paman niini, gi-awhag gihapon ni Tumulak ang publiko nga magpaabot sa ilang schedule ilabi na sa katung mga naka-rehistro na online.
Samtang, nanawagan kini nga dili mopalit og peke nga vaccine card kay gawas nga iligal kini kay gibutang usab nila ang ilang kaugalingon ug ang ilang pamilya sa risgo nga matakdan sa sakit tungod kay wala nabakunahan kontra COVID-19.// EKP
