CEBU – Laing pagpamusil na usab ang nahitabo sa Bayawan City, Negros Oriental alas 8:50 sa buntag, Martes, Marso 1, 2022 diin mao na kini ang ikaduha sulod lang karong semanaha.
Giila sa kapulisan ang biktima nga si Wenifred Abrasaldo alyas Boyboy, hingkod ang pangidaron, minyo, taga Purok 2, Barangay Tayawan sa naasoy ra usab nga dakbayan.
Base sa impormasyon nga nakuha sa kapulisan, nasayran nga sayo ninglugsong ang biktima kuyog ang asawa, manghud ug pag-umangkon aron magsugat unta sa iyang inahan apan samtang padulong na kini silang mamahaw sa usa ka kalan-anan sa may Bollos Street, Brgy. Boyco duol sa may Torillo Store, kalit nga gipusil ang biktima sa wa pa mailhing mamumuno.
Hangtod karon blangko pa ang kapulisan sa motibo sa maong mga pagpamusil ug dugang imbestigasyon ang gihimo kalabot sa maong mga insidente.
Kahinumdoman nga usa ka adlaw sa wala pa ang insidente, aduna usay gipusil sa Brgy. Minaba, Bayawan City nga nailhan sa pangalang alyas Toto Bawega.
