Balhug karon sa bilanggoan sa Carbon Police Station si alyas “Josh” human siya gipadakop sa duty manager sa usa ka imnanan sa Pelaez St. Cebu City kaganihang kadlawn tungod kay iyang gisukmag ang glass door ug panel og nakamugna kini og kahasol sa mao nga dapit.
Si “Josh”, 20 anyos, ug lumad nga taga Alcoy, usa ka helper sa manindahay ug prutas sa Carbon Public Market.
Sa pakighinabi sa Bombo Radyo Cebu News Team ngadto kang “Josh” iyang gisaysay nga nag-ugat ang maong insidente human nga gibalibaran siya sa duty manager sa mao nga imnanan nga mo-table ug babaye sa mao nga establisymento bisan nga aduna siyay kapasidad nga makabayad ug 350 pesos pang table para ubanan.
Gikasakit usab ni “Josh” ang pamaagi sa pagbalibad niini hinungdan nga tungod sa iyang kalagot iyang gisukmag ang glass door sa mao nga KTV Bar hinungdan sa pagkabuak niini og sa pagkasamad niya sa iyang tuong kamot.
Giangkon sab ni “Josh” nga naka inom na sila daan ato nga higayona sa wala pa nahitabo ang insidente.
Ingun man nahibong siya nganung sa karon nga higayon lang siya wala tuguti na makatable, labi na nga ikatulo na kini niya nga higayon nagbalik-balik sa maong KTV.
