Gikalipay sa garbo sa Sugbo nga si Jose LG Fuentes ang pagdayeg ni Mr. Ryan Cayabyab kaniya human makuha ang Best Interpreter award sa bag-o lang nahuman nga The 3rd National Bombo Music Festival.
Sa eksklusibo nga pagpakighinabi sa Bombo Radyo ngadto sa bantugang musician nga si Cayabyab, gidayeg niini ang pagkanta ni Fuentes sa komposisyong “LDR” gumikan kay nalingaw kini sa iyang performance.
Una nang nagkanayon si Mr. C, kinsang nahimong judge sa Bombo Music Festival, nga deserving ang pagkadaug sa Sugbuanong musikero tungod kay komportable kini hinimo niyang kanta.
Tungod niini, nalipay si Fuentes sa reaksyon ni Cayabyab sanglit gipahimuslan niya ang higayon nga ipadungog ang orihinal niyang kanta sa kinabag-ang Pilipino.
Matud sa taga-Consolacion nga gi-enjoy niya ang pagkanta sa stage sanglit gipangandaman gayud kini.
Gibutyag usab ni Fuentes nga nagpa-customize kini og ukelele sa Lapu-Lapu City diin tuyo niyang gihimo aron adunay magamit sa iyang live performance.
Gipasalamatan ni Fuentes ang tanang mga Sugbuanon nga misuporta kaniya, ingon man sa mga naka-appreciate sa iyang kanta nga nahisgut sa usa ka “long distance relationship.”
Gawas sa pagka-Best Interpreter, nakadaug ang kantang ni Fuentes nga “LDR” isip 2nd runner up sa Bombo Music Festival nga napahigayon niadtong Enero 11 sa Iloilo City.
