CEBU CITY – Nasikop ang usa ka high value target sa usa ka motel gahapon sa V. Rama St., Barangay Calamba, Dakbayan sa Sugbo.
Kini subay na sa gipahigayun nga buybust operation sa Drug Enforcement Group inubanan sa City Intelligence Branch (CIB).
Giila ang suspetsado nga si Johndave Contado, 22 anyos ug residente sa nahisgutang dapit.
Kung diin gi-angkon ni Contado nga siya runner sa maong iligal nga drogas kung diin makuha kini niya pinaagi sa pag-abot-abot lang sa gikasabutan nga dapit.
Matud usab ni Contado nga aduna siyay kuyog nga 17 anyos nga bata kung diin kakunsabo usab niya sa maong transaksyon.
Apan nagkanayon si Police Supt. Glenn Mayam, ang hepe sa Drug Enforcement Group kinsa nangulo usab sa nahisgutang operasyon, nga wala kini kauban nga 17 anyos nga bata sa gibuhat niini nga transaksyon sa iligal nga drogas.
Matud ni Mayam nga usa ka bulan na nila nga gimanmanan si Contado ug giinsistir niini nga dili kini bag-o nga runner.
Gibutyag ni Mayam nga gipahigayun ang ilang transaksyon pinaagi sa usa ka text message nga miresulta sa pagkasikop sa suspetsado.
Gitataw ni Mayam nga low grade ang nasakmit nga 100 gramos nga shabu gikan ni Contado kung diin mubalor ug 1.1 milyon ka pesos.
Giklaro ni Contado nga nga halos pareho ra ang presyo sa nahisgutang shabu ug sa high grade o white crystalline nga shabu nga nagkahinay na ang supply.
Sa pagkakaron, padayun pa gihapon ang pagsuta sa gigikanan sa maong drogas ug aduna bay nagpaluyo nga mga drug troops niini.
Samtang nasikop usab ang gituohang kauban ni Contado nga usa usab ka Level 1 drug pusher sa dalan Katipunan, Brgy Labangon, dakbayan sa Sugbo kagahapong adlawa.
Kini subay na sa gipahigayon nga buybust operation sa Drug Enforcement Group kauban ang Cebu City Police Office (CCPO)-City Intelligence Branch (CIB).
Giila ang maong dinakpan nga si Rodel Tampus, ug lumad nga taga Brgy Labangon.
Gibutyag ni Police C/Insp Christopher Navida, ang hepe sa CIB, nga usa ka buwan na nila nga gipaubos sa surveillance ang dinakpan ug sa ilahang nasayran nga halapad kini og transaksyon kung diin gikan sa Brgy Labangon, anaa pa kini transaksyon sa Brgy Duljo-Fatima lakip na probinsiya sa Sugbo partikular na sa dakbayan sa Talisay ug lungsod sa Minglanilla.
Sa gipahigayon nga operasyon, nakuha sa kapulisan ang usa ka kilong shabu diin mukabat kini sa 14 milyones ka pesos ang kantidad.
Gihimakak usab sa dinakpan nga iya ang bag nga gisudlan sa shabu ug midepensa nga tag-iya niini ang iyahang higala nga si ‘certain Joshua’ ug sigon pa nga gibilin lang kini ngadto kaniya uban sa saad nga mubalik apan wala na kini balika.
Nasayran nga gipahigayon ang maong operasyon sa susamang oras ug adlaw kung diin gitunga sa duha ka team ang mga sakop sa Drug Enforcement Group ug ang mga sakop sa City Intelligence Branch.
