Gipahibalo sa Pakistan nga ang pampublikong transportasyon nga gidumala sa estado sa kapital nga Islamabad ug ang pinakadaghang populasyon nga probinsya sa nasud libre alang sa publiko sulod sa usa ka bulan, human sa pagsaka sa presyo sa gasolina tungod sa gubat sa Middle East.
Ang lakang nahitabo human sa mga protesta sa tibuok nasud ug taas nga linya sa mga motorista sa mga gasolinahan gumikan miabot sa 42.7 porsyento nga pagtaas ang presyo sa lana ngadto sa 485 rupees (US$1.74) kada litro.
Misaab usab si Pakistan Prime Minister Shehbaz Sharif, nga ipaubos ang presyo ngadto sa 378 rupees kada litro.
Sa laing bahin, ang presyo sa diesel sa nasud magpabilin sa 520 rupees kada litro human sa 54.9 porsyento nga pagtaas.
Gawas sa libreng sakay, ang punong ministro sa Punjab nagpahibalo usab og libreng transportasyon nga gipadagan sa estado ug “targeted subsidies” sa mga trak ug bus, samtang si Maryam Nawaz Sharif nanawagan sa mga operator nga dili ipasa ang dugang nga gasto sa mga pasahero.
Sa Sindh, susamang mga subsidyo ang gipatuman para sa mga motorista ug gagmay nga mga mag-uuma sa Karachi.
Ang Pakistan nagpatuman og mga lakang sa pagdaginot, lakip ang pagbalhin sa pipila ka mga opisina sa gobyerno ngadto sa upat ka adlaw nga semana sa trabaho, pagpalugway sa mga holiday sa eskwelahan, ug pagpatuman sa mga online nga klase, taliwala sa usa ka bulan nga kagubot sa Middle East.
Sumala sa World Bank, mga 25 porsyento sa 240 milyon nga populasyon sa Pakistan ang nagpuyo sa kakabus.
Samtang, ang ubang mga nasud sa Asya nakatala usab og taas nga presyo sa enerhiya, lakip ang Bangladesh, nga nagpataas sa presyo sa liquefied petroleum gas ug compressed natural gas og 29 porsyento niadtong Huwebes.
