Nag-isyu na og mga special permits ang buhatan sa Land Transportation Franchising an Regulatory Board – Central Visayas (LTFRB-7) para sa mga pampublikong sakayan nga mag-operate sa kadalanan karong nagsingabot nga dagsa sa pasahero atol sa Pasko ug Bag-ong Tuig nga selebrasyon.
Kini ang eksklusibong gipamahayag ni Eduardo Montealto Jr., ang Regional Director sa LTFRB-7 sa Bombo Radyo Cebu News Team diin saysay pa niini nga nag-isyu na sila og mga special route extension permits sa mga Public Utility Vehicles (PUVs) diin epektibo kini sa Disyembre 18 hangtod sa Enero 4 sa tuig 2026.
Gilatid ni Montealto nga tinuig kini nila nga preparasyon sa ilang intensified operation sa mga units sa PUVs diin ang aplikasyon kay nagpadayon gihapon sa pagkakaron.
Gani ang LTFRB-7 nakig-alayon na sa mga LGUs ug uban pang ahensya sa gobyerno nga nagbantay sa sektor sa transportasyon sa Sugbo ug Bohol lakip na ang mga transport cooperatives aron mapahinguspan pa ang koordinasyon ug preparasyon sa holiday season.
Ingon man nga ang maong ahensya kay kada adlaw nag-monitor sa mga pampublikong terminal aron masigurong ang mga kahimtang sa mga PUVs ug mga drayber niini kay aduna sa maaong kondisyon sa pagbyahe sa mga lagyong destinasyon.
Padayong pahimangno sa mga awtoridad sa publiko nga mag-amping ug pabiling alerto sa byahe karon panahon sa kapaskuhan og bag-ong tuig aron ang sleebrasyon kay malipayon og layo sa bisan unsang katalagman sa kadalanan.
