CENTRAL VISAYAS- Nihimo ang Land Transportation Franchising and Regulatory Board-Central Visayas (LTFRB-7) og hugot nga pagpangandam alang sa umaabot nga Semana Santa-2025.
Sa pakighinabi sa Bombo Cebu News Team, kang Eduardo C. Montealto, Jr., Regional Director sa LTFRB-7, iyang gibutyag ang ilang mga kalihokan karon sama sa inspeksyon, pag-isyu og special permit, ug ingon man ang paghatag og show cause order.
Gitino ni Montealto, nga aduna na silay lima (5) ka bus operators nga na isyuhan og show cause order, tungod sa mga depekto nga napalgan sa ilang mga bus units, sukad niadtong Lunes, Abril 7, 2025.
Kadaghanan sa ilang namatikdan mao ang pagkawala sa mga fire extinguisher, o mga expired na, depektoso nga mga ligid, ug uban pa.
Ang maong inspeksyon alang sa North bus ug South bus terminal, kanunay nila nga gihimo og dili lang kausa sulod sa usa ka adlaw.
Sa pikas bahin, ang aplikasyon sa special permit magsugod karong umaabot nga Sabado, Abril 12, hangtod Abril 20, 2025.
Kini alang sa mga operator nga gustong moagi og extension route.
Subay niini, sila nakig-alayon sa Land Transportation Office (LTO), sa pagbutang og mga high-way patrol, aron masiguro nga madakpan ang bisan unsang anomaliya nga mahitabo sa mga karsada.
Matod ni Montealto, kung adunay mga ilegal o dili regular nga maniobra, ang mga drayber mahimong mapahamtangan og silot nga suspensiyon sulod sa 30 ka adlaw o usa ka tuig.
Adunay lain usab nga kantidad sa mga multa; kung diin ang Van Php200,000—Jeepney Php50,000—ug sa dagko o mini-bus, 1 million.
