METRO MANILA-Nipasalig ang Land Transportation and Franchising Regulatory Board (LTFRB) nga magpadayon ang pag-uswag sa Public Utility Vehicle Modernization Program (PUVMP).
Kini bisan pa man sa pagduso sa Senado sa temporaryong pagsuspenso sa maong programa.
Base sa giluwatang pamahayag sa LTFRB, magpadayon kini sa pagtuman sa PUVMP, inubanan sa mga drayber, operator, ug transport groups.
Nalatid usab sa pamahayag nga girespeto sa LTFRB ang resolusyon nga giluwatan sa Senado nga naghangyo sa temporaryong pagsuspenso sa programa.
Hinuon ang ahensya, pinaagi ni LTFRB Chief Teofilo Guadiz III, nitumbok nga ang public transportation modernization program maoy tubag sa gobyerno sa nagkagrabeng problema sa transportasyon.
Matud niya nga ang LTFRB, magpabiling komitado sa paghatag sa husto, luwas, ug episyente nga serbisyo alang sa mga sumasakay ug aron makabaton ug mas maayong serbisyo sa transportasyon, pinaagi sa modernization program.
Kung kahinumduman nga miabot sa 22 ka mga Senador ang mipirma sa Senate Resolution No. 1096 nga naghangyo sa temporaryong pagsuspenso sa Public Utility Vehicle Modernization Program (PUVMP), nga karon nailhan na nga Public Transport Modernization Program (PTMP).
Hinungdan sa mga Senador, kinahanglang sulbaron una ang mga kabalaka nga gipadangat sa mga drayber, grupo, asosasyon, ug transport cooperatives kalabot sa maong programa.
