CENTRAL VISAYAS-Mi-isyu og Show Cause Order (SCO) ang Land Transportation Office (LTO) Region 7 pinaagi ni Regional Director Glen G. Galario batok sa mga drayber sa taxi ug habal-habal nga nalambigit sa usa ka sinumbagay sa Brgy. Marigondon, Lapu-Lapu City sa milabay nga Lunes, Oktubre 2, 2023, subay sa mando ni LTO Chief Assistant Secretary Vigor Mendoza II nga motubag sa mga kabalaka sa road rage ug road safety.
Gihulagway ni Galario nga “alarming” ang dautang binuhatan sa duha ka drayber nga nalambigit ug matod niya nga angayan kini nga atubangon dayon ilabi na nga may kalambigitan sa road safety ug tungod sa kagubot hinungdan sa paghuot sa trapiko sa maong dapit, matod sa mga saksi.
Gimanduan ni Galario pinaagi sa naasoy nga SCO ang duha ka mga drayber sa pagpasabot nganong dili sila angayng silotan ubos sa Section 48, Article 5 sa Republic Act 4136, o ang Land Transportation and Traffic Code.
Gihimug-atan usab ni Galario nga ang maong pamatasan wala’y lugar sa kadalanan gumikan kay gikompromiso niini ang kaluwasan sa dalan, ilabi na nga pareho silang drayber sa mga public utility vehicles.
Dugang sa opisyal nga obserbahan sa gihapon nila ang due process, hinungdan nga gipangayo usab nila ang habig sa duha ka nalambigit nga drivers.
Kahinumduman nga ubay-ubay na sa mga drayber nga nalambigit sa mga insidente sa road rage ang gisilotan sa miaging mga semana.
Una nang gimando ni LTO Chief Mendoza ang tanang LTO RDs nga mahimong responsive ug pro-active sa pag-atubang sa road safety matters.
Giawhag usab niya ang publiko, lakip ang mga netizens, nga i-report ang susamang mga insidente sa LTO alang sa dinalian ug angay nga aksyon.
