CENTRAL VISAYAS- Gibawi sa Land Transportation Office (LTO) 7 ang lisensya sa tulo ka mga public utility vehicle drivers human nibalik sa ilang confirmatory test nga positibo sa paggamit sa ilegal nga drugas.
Gibutyag ni LTO 7 Regional Director Glen G. Galario nga positibo ang tulo ka mga drayber atol sa random testing sa North ug South Bus terminals sa Sugbo niadtong Semana Santa niadtong Abril.
Dugang pa niya nga ang tulo ka mga drayber mao ang labing unang mga drayber sa public utility vehicle nga natangtangan sa ilang lisensya para sa tuig 2025.
Gipahinumdoman usab niini ang publiko nga dili katungod ang paghupot og driver’s license, kondili prebilihiyo sa mga angayan nga makabaton niini.
Gikan Enero 1, 2025 hangtod Hulyo 22, 2025, gibawi usab sa LTO 7 ang 12 ka mga lisensya sa pagmaneho tungod sa pagbaton og kapin sa 40 ka demerit points.
Ingon man nga gisuspenso usab sa maong buhatan ang 411 ka driver’s license tungod sa nagkadaiyang kalapasan.
Sagad sa mga kalapasan naglakip sa reckless driving, driving without a valid driver’s license, failure to wear seatbelt, ug overcharging sa mga pasahero o paglapas sa franchise terms.
Sa samang panahon, girekomendar usab sa LTO 7 nga bawion o suspindihon ang lisensiya sa 28 ka mga driver’s license holder tungod sa nagkadaiyang kalapasan sama sa road crashes ug mga kalapasan nga nakuhaan sa video nga nag-viral online.
Miisyu usab ang LTO 7 og temporaryo nga operator’s permit ug gisuspinde ang driver’s license sa lima ka vloggers tungod sa paglapas sa balaod trapiko sa unang bahin sa 2025. | Bombo Nathaniel Sandoval
