Nakadawat ang mga motorista og mga pahibalo gikan sa mga opisyal sa Land Transportation Office sa Central Visayas (LTO-7) isip kabahin sa ilang gipalig-on nga kampanya aron pangitaon ug ihatag ang mga plaka direkta ngadto sa mga tag-iya.
Gipalapad sa LTO-7 ang ilang Aggressive Plate Replacement Campaign usa ka semana human kini sugdi niadtong Hunyo 15, diin nagpadala sila og mga personahe aron ilhon ang mga sakyanan nga duna nay magamit nga replacement plates, susihon ang mga rehistro, ug ipadali ang pagkuha niini pinaagi sa mga district offices.
Ang mga tigpatuman dungan nga nagbilin og mga flyers sa mga sakyanan, ilabi na niadtong naggamit pa gihapon sa daan nga green nga plaka, aron ipahibawo sa mga tag-iya nga mamahimong anaa na ang ilang bag-ong plaka ug giyahan sila kung asa kini dapit kuhaon.
Matod pa ni LTO-7 Director Atty. Wendel C. Dinglasan, mas gihimo na karon nga proactive ang pamaagi sa ahensya pinaagi sa pagdala sa ilang serbisyo direkta ngadto sa mga komunidad tungod kay daghan sa mga motorista ang wala masayod nga anaa na ang ilang mga plaka.
Iyang gipasabot nga dili na sila maghulat nga ang mga tawo pa ang moadto sa ilang buhatan, kondili sila na mismo ang moadto sa mga dapit aron magbilin og notice sa mga tag-iya aron masiguro nga ang matag plaka nga anaa sa ilang pag-atiman mahatag dayon ngadto sa tinuod nga tag-iya niini.
Kini nga inisyatiba nahiuyon usab sa mga unang kamandoan gikan sa sentral nga buhatan diin gimandoan ang mga sangang buhatan nga awtomatikong susihon ang availability sa plaka sa matag higayon nga dunay mag-renew sa rehistro, aron makuha kini sa mga motorista samtang nagproseso sa ilang transaksyon.
Tungod niini, ang mga district offices, extension offices, mobile units, inspection units, ug ang Visayas Plate Courier and Distribution Hub gimandoan nga maghupot og updated nga imbentaryo ug magtinabangay alang sa paspas nga pagpang-apod-apod sa tibuok rehiyon.
Ang maong kampanya naglakip sa mga replacement plates nga gibayran pa niadtong tuig 2015, ingon man ang mga motor nga naggamit pa sa daang berde nga plaka nga ilisan na karon og standardized nga black-and-white nga plaka.
Gihimo ang mas gipanghingusgan nga field operations aron makunhuran ang gidaghanon sa mga unclaimed plates maong nasayran sa ahensya sayo ning tuiga nga hapit katunga sa usa ka milyon nga plaka sa sakyanan ang nagpabilin nga wala makuha sa Central Visayas, diin 167,352 lamang gikan sa 487,624 ka pending plates ang na-claim o anaa lang sa 34.32 porsyento niadtong Pebrero 27.
Dugang niini, nagpahinumdom usab ang LTO-7 sa mga drayber sa pag-renew sa ilang mga lisensya, student permits, ug rehistro sa sakyanan sa dili pa ang Hulyo 31, subay sa kasamtangang sumbanan human sa unang gihatag nga lugway diin walay penalties o multa nga gipahamtang sa mga ulahing nag-renew.
