CEBU CITY-Nakadawat ang buhatan sa Land Transportation Office (LTO) 7 og mga taho kalabot sa mga taxi driver nga nag-‘overcharging’ o sobrang pagpaningil sa mga delegado sa Palaro.
Hinungdan nga gipahimangnoan ni LTO 7 Regional Director Glen G. Galario ang mga drayber sa public utility vehicles (PUVs) nga mag-atubang sila sa sangpotanan kon masakpan nga mag-overcharging sa plitehan ilabi na ning nagpadayon nga Palarong Pambansa 2024.
Subay niini, gitahasan sa Regional Director ang Operations Division sa LTO 7 nga mohimo og random operations batok sa maong mga drayber ug pahamtangan og silot ang mga madakpan sa akto.
Dugang pahinumdom ni Galario ngadto sa mga pasahero nga magkuha og litrato o video isip ebidensya sa ilang reklamo nga ipresentar atol sa hearing sa buhatan sa LTO.
Ilakip usab ang mga detalye sama sa plate number, petsa, oras, lokasyon diin nahitabo ang insidente.
Ubos sa multa ug silot sa LTO sa mga paglapas sa mga balaod, lagda ug regulasyon nga nagdumala sa Land Transportation, ang mga drayber nga sad-an sa overcharging mag-atubang og multa nga P5,000 sa unang paglapas, P10,000 sa ikaduhang paglapas ug P15,000 sa ikatulong kalapasan.
Samtang ang mga drayber nga mag-atubang og kalapasan sa paglapas sa kondisyon sa prangkisa kay pahamtangan og P6,000 nga multa ug posibleng bawion sa ilang prangkisa ug ang ilang lisensya.
