Nakabuak og bag-ong Guinness World Records title ang usa ka soccer enthusiast gikan sa Kosovo human niya masulayan ang iyang talagsaong abilidad sa pagsul-ob og 17 ka T-shirt samtang padayon niyang ginapauntol ang soccer ball gamit ang iyang ulo.
Si Agim Agushi, 56-anyos, usa ka high school mathematics teacher ug minyo nga amahan sa duha ka anak, nakalabaw sa iyang kaugalingong rekord nga 14 ka T-shirt alang sa pinakadaghan nga T-shirt nga nasul-ob samtang gapauntol og soccer ball gamit ang ulo.
Matud ni Agushi, adunay espesyal nga kahulugan ang iyang bag-ong rekord tungod kay ang 17 ka T-shirt nagsimbolo sa Pebrero 17, nga Independence Day sa Kosovo.
Dili kini ang unang Guinness World Records title ni Agushi, tungod kay nakahupot usab siya og rekord sa pinakadaghan nga T-shirt nga natangtang samtang nag-heading og soccer ball nga mikabat sa 28.
Nakahimo usab siya og rekord nga 164 ka higayon sa pagsul-ob ug pagtangtang sa T-shirt samtang gapauntol ang soccer ball gamit ang ulo.
Kauban si Bujar Ajeti, nakahupot usab si Agushi sa rekord alang sa pinakataas nga panahon sa pag-heading og soccer ball tali sa duha ka tawo, nga mikabat sa 34 minutes ug 1 second.
