CEBU CITY-Padayon ang imbestigasyon sa kapulisan sa Dalaguete Police Station human nga duna na silay person of interest sa pagtulis patay sa usa ka mag-uuma sa may Sitio Lipo Brgy. Maloray lungsod sa Dalaguete kagahapon.
Naila ang biktima nga si Magdaleno Binavente, 68 anyos ug residente sa naasoy nga dapit.
Matud ni Police Corporal Jim Pacaldo ang Desk Officer sa Dalaguete PS nga nakit-an ang patay lawas sa mag-uuma sa iyang saop nga nagbuy-od sa iyang yuta mao nga misumbong kini sa ilang mga barangay officials.
Ang mga barangay officials na usab ang mireport niini sa kapulisan sanglit layo ug bukid ang maong lugar.
Basi sa imbestigasyon, nasuta nga gisaka na usab ang balay sa biktima human nga nadungog kini nga nahalinan og dako sa iyang umahan apan wala matud pay nakuha ang kawatan.
Gani, kung mulakaw ang biktima magdala-dala matud pa kini sa iyang sling bag nga dunay sulod nga kwarta nga dili muminos sa 40 mil pesos sigon pa sa igsoon niini.Wala usab kini mabinlan tungod kay ulitawong guwang man kini.
Apan kalit nalang kining nakaplagan gahapon nga wala nay kinabuhi ug napuno sa dinunggaban ang nawong, lawas ug bukton.
Wala na usab ang bag nga gidala dala niini.
