Giawhag ni Representative Brian Raymund Yamsuan ang mga local government units (LGUs) sa paghimo og community-based programs batok sa online sexual abuse ug exploitation of children ug sa pagduso og ordinansa aron tapuson ang nasangpit nga krimen.
Matod ni Yamsuan, ang pakigbatok sa OSAEC kay kinahanglang dad-on ngadto sa lebel sa barangay aron mas mapalig-on pa ang hiniusang paningkamot sa gobyerno ug pribadong sektor aron luwas ug mapanalipdan ang kabataang Pilipino gikan sa pag-abuso.
Gipahinumdoman usab ni Yamsuan ang mga LGUs nga ubos sa Republic Act 11930 o ang Online Sexual Abuse and Exploitation of Children (OSAEC) And Anti-Child Sexual Abuse or Exploitation (CSAEM) Act, ang mga sanggunian o LGU councils gikinahanglan nga mopasar og mga ordinansa nga nagtinguha nga ma-localize ang maong balaod sa pakig-away batok sa mga nakahimog “heinous crimes against our children.”
Gihimo ni Yamsuan ang pahayag human ang graphic artist sa Disney ug Pixar studios, si Bouhalem Bouchiba, nakit-an nga sad-an sa korte sa France ug gisentensiyahan og 25 ka tuig nga pagkapriso.
Dugang pa ni Yamsuan, nga dili angay i-tolerate ang maong mga heinous crimes hinungdan nga ang DILG nipahinumdom sa mga opisyal sa barangay nga dili gayud sila mosugot nga husayon? ang mga kaso sa sekswal nga pang-abuso sa mga bata.
Matod sa magbabalaod, kinahanglang mo-report ang mga opisyal sa barangay ngadto sa mga otoridad kung adunay mga taho nga adunay kalambigitan sa OSAEC.
