CEBU CITY-Gitawag ni Magdalo Representative Gary Alejano nga palying safe si Presidente Rodrigo Duterte gumikan sa pagpakahilum niini sa kontrobersiya nga gikalambigitan sa Bureau Of Customs kabahin sa pagkasakmit sa 6.4 billion pesos nga kantodad sa shabu shipment gikan sa China.
Sa pakighinabi sa Bombo Radyo Cebu kang Alejano, gibutyag niini nga susamang walay paki-alam ang presidente sa binilyon nga kantidad sa nasakmit nga shabu nga niagi pa mismo sa customs.
Matud niini nga kadudahan ang pagpakahilom sa presidente og dili parehas sa naandan nga masuko kini ug ug magyawyaw basta drogas ang pagahisgutan. Gibutyag pa ni Alejano nga kumpyansa kaayo ang nagpadala sa maong shipment nga dili kini hilabtan sa presidente taliwa sa subsub nga kampanya sa iligal nga droga.
Gihimug-atan usab niini nga angayang palawman ang imbestigasyon sa BOC hilabi na nga nalambigit pa ang pangalan sa anak sa Presidente nga si Davao City Vice Mayor Paulo Duterte.
Dugang pa usab ni Alejano nga bisan og anak kini sa Presidente wala kini nagpasabot nga exempted kini sa imbestigasyon.
