CENTRAL VISAYAS-Nabatyagan ang linog sa dakong bahin sa Sugbo sa linog nga nahitabo kagahapon sa alas 2:53 sa hapon niadtong adlaw sa Domingo Septiyembre 29, 2024.
Sa datus nga natala sa DOST-PHIVOLCS, ang nasangpit nga linog adunay magnitude 5.1 sa kasadpang bahin sa kadagatan sa Poro sa isla sa Camotes sa Sugbo nga adunay gilawmon nga 10 kilometros.
Dugang sa mga detalye, ang lungsod sa San Fernando sa habagatang lalawigan sa Sugbo natala nga Intensity III.
Samtang alas 4:45 sa hapon natala ang aftershock nga magnitude 2.2 nga adunay gilawmon nga 23 km sa kadagatan nga sakop gihapon sa Poro sa isla sa Camotes sa Probinsiya sa Sugbo.
Sa pagkakaron, walay natalang danyos sa linog nga nitay-og sa Sugbo apan ang buhatan sa DepEd Cebu City Division miluwat og kamandoan sa temporaryong pagsuspenso sa face-to-face classes aron sa pagsusi sa integridad sa mga school buildings.
