BOHOL- Patay ang usa ka policewoman human kini matud pa nakigpinusilay sa iyang bana sa Sitio Ingod, Brgy. Sentro, Tubigon probinsya sa Bohol.
Giila ang biktima nga si Police Staff Sgt. Juliet Tuquib nga nadestino sa Clarin Bohol PS samtang ang bana niini naila nga si Police Staff Sergeant Ariel Tuquib nga na-assign usab karon sa Police Holding Account Unit (PHAU) sa Camp Sergio Osmeña sa Cebu.
Matud sa imbestigasyon, nga nakadungog og buto ang katabang sulod sa kwarto sa magti-ayon hinungdan nga nanawag kini og pulis.
Sa dihang mi-responde ang mga otoridad, naglisod kini sa pagsulod sa kwarto gumikan kay nakalock, hinungdan nga giguba nalang niini ang pultahan.
Sa dihang naablihan sa mga pulis ang kwarto, napalgan nila ang babae nga pulis nga naligo na sa iyang kaugalingong dugo, samtang ang asawa niini ang naglingkod matud pa og nalipong na ug dunay igo sa nawong nga gitoohang gipusil sa iyang asawa.
Nasayran usab nga dunay problema ang magti-ayon sa ilang relasyon gumikan kay kanunay kini nga mabatian nga mag-awayay.
Gisuwayan pa usab sa kapulisan og dala sa tambalanan si PSSGT. Juliet Tuquib apan gideklarar na kining Dead on Arrival. Samtang ang bana niini ang nalandig na usab sa tambalanan.
