WALA na makatudlo pagbalik sa kindergarten ang usa ka 35-anyos nga lalaking magtutudlo sa Paris, France gumikan sa mga patik sa tibuok lawas.
Unang mireklamo ang mga ginikanan sa usa ka tinun-an gumikan sa dili maayong imahe.
Giila ang maong magtutudlo nga si Sylvian Heleine ug nagtudlo kini sa Docteur Morere Elementary School.
Gawas nga napuno sa patik ang iyang lawas, adunay tattoo usab ang iyang nawong, dila, lakip na ang mga mata.
Matud ni Helaine nga maayo unta ang pagtrato sa mga tinun-an ngadto kaniya apan dili maayo ang paglantaw sa ubang “judgemental” ngadto kaniya.
Sigon pa sa reklamo sa usa ka ginikanan, nahadlok ug dili maayo ang damgo sa iyang 3-anyos nga anak human makakita sa maong magtutudlo nga napuno sa patik.
Wala hinuon kini makatudlo sa kindergarten apan mahimo gihapon kining makatudlo og grade 6 pataas.
Nasubo si Helaine sa desisyon sa school administration gumikan sa giingong kahadlok sa mga tinun-an sa grade 6 paubos sa iyang hitsura.
Apan padayon gihapon ang kinabuhi niini kay gawas nga gihigugma niya ang pagtudlo, nahimo nang kabahin ang pagpatattoo sanglit nalikayan niini ang existential crisis.
Nanghinaut kini nga dawaton kini sa ubang mga tawo nga sama lang sa normal nga indibidwal. /Reuters
